മാധ്യമ സർവേകൾ:

ജനവിധിയെ അട്ടിമറിക്കാനുള്ള ആസൂത്രിത നീക്കമോ?

കേരളം മറ്റൊരു നിയമസഭാ തിരഞ്ഞെടുപ്പിന്റെ പടിവാതിൽക്കൽ നിൽക്കുമ്പോൾ, പതിവുപോലെ ചാനലുകൾ സർവേ പരമ്പരകളുമായി രംഗത്തെത്തിയിരിക്കുകയാണ്. ഏറ്റവും ഒടുവിലായി മാതൃഭൂമി പുറത്തുവിട്ട സർവേ ഫലങ്ങളും ഇതിന്റെ തുടർച്ചയാണ്. എന്നാൽ, കഴിഞ്ഞകാല ചരിത്രവും നിലവിലെ രാഷ്ട്രീയ സാഹചര്യങ്ങളും പരിശോധിച്ചാൽ ഈ സർവേകൾ യാഥാർഥ്യവുമായി എത്രത്തോളം അകലെയാണെന്ന് വ്യക്തമാകും. ജനമനസ്സുകളെ സ്വാധീനിക്കാൻ മാധ്യമങ്ങൾ നടത്തുന്ന 'മസ്തിഷ്ക പ്രക്ഷാളന' തന്ത്രങ്ങളെ ജനം തിരിച്ചറിയേണ്ടതുണ്ട്.

കിഫ്ബിയും മാധ്യമ നിശബ്ദതയും

സർക്കാരിന്റെ വികസന ഏജൻസിയായ കിഫ്ബി, പരസ്യങ്ങൾക്കായി മാത്രം 160 കോടി രൂപയാണ് മാധ്യമങ്ങൾക്ക് നൽകിയിട്ടുള്ളത് എന്ന വസ്തുത ഗൗരവകരമാണ്. പൊതുജനങ്ങളുടെ പണം ഉപയോഗിച്ച് നടത്തുന്ന ഇത്തരം 'പരസ്യ വിതരണം' സ്വാഭാവികമായും മാധ്യമങ്ങളുടെ വാർത്താ നിലപാടുകളെയും സർവേ ഫലങ്ങളെയും സ്വാധീനിക്കുന്നുണ്ട്. കോടികൾ നൽകുന്ന ഭരണകൂടത്തോട് നന്ദി കാണിക്കേണ്ടത് മാധ്യമങ്ങളുടെ നിലനിൽപ്പിന്റെ ഭാഗമായി മാറുമ്പോൾ, അവിടെ നിഷ്പക്ഷമായ സർവേകൾ അസാധ്യമാകുന്നു. വെറും പിആർ വർക്കുകളെ സർവേകളായി അവതരിപ്പിക്കുകയാണ് പല മുഖ്യധാരാ മാധ്യമങ്ങളും ചെയ്യുന്നത്.

തദ്ദേശ തിരഞ്ഞെടുപ്പും രാഷ്ട്രീയ മാറ്റങ്ങളും

ഇക്കഴിഞ്ഞ തദ്ദേശ തിരഞ്ഞെടുപ്പ് ഫലങ്ങൾ ഇടതുപക്ഷത്തിന് വലിയ തിരിച്ചടിയും ബിജെപിക്ക് ദയനീയ പരാജയവുമാണ് സമ്മാനിച്ചത്. ഇത് മലയാളികൾക്കിടയിൽ ഭരണവിരുദ്ധ വികാരം ശക്തമാണെന്നതിന്റെ തെളിവാണ്. പിണറായി വിജയന്റെ ഏകപക്ഷീയമായ ഭരണശൈലിക്കെതിരെ എൽഡിഎഫിനുള്ളിൽ തന്നെ പൊട്ടിത്തെറികൾ ഉണ്ടാകാൻ ഈ ഫലം കാരണമായി. ജി. സുധാകരൻ, ഐഷ പോറ്റി, പി.കെ. ശശി , കുഞ്ഞികൃഷ്ണൻ, ടികെ ഗോവിന്ദൻ തുടങ്ങിയ നേതാക്കളുടെ പരസ്യമായ അതൃപ്തികൾ പുറത്തുവന്നത് ഈ പുതിയ രാഷ്ട്രീയ സാഹചര്യത്തിലാണ്. തദ്ദേശ തിരഞ്ഞെടുപ്പിൽ വോട്ടർമാർ നൽകിയ ഈ മുന്നറിയിപ്പ് വരാനിരിക്കുന്ന നിയമസഭാ തിരഞ്ഞെടുപ്പിൽ കൂടുതൽ ശക്തമായി പ്രതിഫലിക്കുമെന്ന് ഉറപ്പാണ്.

ലോക്സഭാ തിരഞ്ഞെടുപ്പിലെ ചരിത്രപരമായ മുൻതൂക്കം

കേരളത്തിലെ വോട്ടർമാരുടെ രാഷ്ട്രീയ പ്രബുദ്ധത വ്യക്തമാക്കുന്നതാണ് കഴിഞ്ഞ കാലങ്ങളിലെ ലോക്സഭാ തിരഞ്ഞെടുപ്പ് ഫലങ്ങൾ. 1984 മുതൽ 2024 വരെയുള്ള പത്ത് തിരഞ്ഞെടുപ്പുകളിൽ ഒമ്പതിലും യുഡിഎഫ് ആണ് വിജയിച്ചത്. 2019-ൽ 19 സീറ്റുകളും 2024-ൽ 18 സീറ്റുകളും നേടി യുഡിഎഫ് ആധിപത്യം ഉറപ്പിച്ചു. എന്നാൽ, മാധ്യമങ്ങൾ പ്രവചിക്കുന്നതുപോലെ ഇടതുപക്ഷത്തിന് അനുകൂലമായ തരംഗം കേരളത്തിൽ ഒരിടത്തും നിലനിൽക്കുന്നില്ല. 2004-ൽ ഇടതുപക്ഷം നേടിയ 18 സീറ്റുകൾ ഒരു പ്രത്യേക രാഷ്ട്രീയ സാഹചര്യത്തിൽ ഉണ്ടായതാണ്. അത് ആവർത്തിക്കപ്പെടുമെന്ന മാധ്യമങ്ങളുടെ കണക്കുകൂട്ടലുകൾ വെറും ദിവാസ്വപ്നം മാത്രമാണ്. കഴിഞ്ഞ ലോക്സഭാ തിരഞ്ഞെടുപ്പിൽ പാലക്കാട് വികെ ശ്രീകണ്ഠനെ മൂന്നാം സ്ഥാനത്തേക്ക് തള്ളിയ മാതൃഭൂമിക്കാർ , വടകരയിൽ ടീച്ചറമ്മക്ക് ഒരു ലക്ഷം ഭൂരിപക്ഷം പ്രവചിച്ച മുഖ്യധാരാ ചാനലുകൾ , ശശി തരൂരിനെയും ഹൈബി ഈഡനെയും തോൽപ്പിച്ചവർ .

വോട്ടർ പട്ടികയിലെ മാറ്റങ്ങളും ബിജെപിയുടെ തകർച്ചയും

ബിജെപി തദ്ദേശ തിരഞ്ഞെടുപ്പിൽ നേടിയ 14.7 ശതമാനം വോട്ടിൽ നിന്നും താഴേക്ക് പോകാനുള്ള സാധ്യതകളാണ് നിലവിലുള്ളത്. വോട്ടർ പട്ടിക പരിഷ്കരണത്തിന്റെ ഭാഗമായി തിരുവനന്തപുരം, തൃശൂർ, മഞ്ചേശ്വരം തുടങ്ങിയ മണ്ഡലങ്ങളിലെ ഇരട്ട വോട്ടുകൾ വൻതോതിൽ നീക്കം ചെയ്യപ്പെട്ടിട്ടുണ്ട്. ഇത് ബിജെപിയുടെ വോട്ട് വിഹിതത്തിൽ വലിയ കുറവുണ്ടാക്കും. കൂടാതെ, മുഖ്യമന്ത്രി പിണറായി വിജയനും സംഘപരിവാറും തമ്മിലുള്ള 'അന്തർധാര' വോട്ടർമാർ തിരിച്ചറിഞ്ഞു കഴിഞ്ഞു. വർഗീയ ധ്രുവീകരണത്തിലൂടെ വോട്ട് നേടാനുള്ള ശ്രമങ്ങളെ കേരളം തള്ളിക്കളയുമെന്നതിന്റെ സൂചനകളാണ് പുറത്തുവരുന്നത്.

സർവേകളുടെ പൊള്ളത്തരം തിരിച്ചറിയുക

കഴിഞ്ഞ അഞ്ച് ലോക്സഭാ തിരഞ്ഞെടുപ്പുകളിൽ ഒരു മാധ്യമ സർവേയും ശരിയായ ഫലം പ്രവചിച്ചിട്ടില്ല എന്നതാണ് സത്യം. വോട്ടർമാരുടെ തലച്ചോറിനെ വഴിതെറ്റിക്കാനുള്ള ശ്രമങ്ങളാണ് പണം വാങ്ങി മാധ്യമങ്ങൾ ചെയ്യുന്നത്. ശബരിമല വിഷയത്തിലെ ജനരോഷവും ശക്തമായ ഭരണവിരുദ്ധ വികാരവും നിലനിൽക്കുമ്പോഴും എൽഡിഎഫിന് 70-75 സീറ്റുകൾ പ്രവചിക്കുന്നത് യുക്തിക്ക് നിരക്കാത്തതാണ്. ഇത്തരം തെറ്റായ സർവേകൾ വരുന്നത് യഥാർത്ഥത്തിൽ യുഡിഎഫിന് ഗുണകരമാവുകയാണ് ചെയ്യുന്നത്. കൂടുതൽ ആവേശത്തോടെയും ജാഗ്രതയോടെയും പ്രവർത്തിക്കാൻ ഇത് പ്രതിപക്ഷത്തിന് കരുത്ത് നൽകുന്നു. നുണപ്രചരണങ്ങളെ വോട്ടർമാർ ജാഗ്രതയോടെ കാണണം.

ഇരുണ്ട നാളുകൾ :