കന്നാസും കടലാസും: കോഴിക്കോട്ടെ ഉണ്ടൻപൊരിയും പാലുംവെള്ളവും, പിന്നെ സഖാക്കളുടെ 'ആത്മപരിശോധനയും'

കോഴിക്കോട് കടപ്പുറത്തെ ഉപ്പുകാറ്റിന് പതിവിലും കൂടുതൽ ചൂടുണ്ടായിരുന്നു. കടൽത്തീരത്തെ ചെറിയ തട്ടുകടയുടെ മൂലയിലിരുന്ന് കന്നാസ് എണ്ണപ്പടർപ്പുള്ള ഉണ്ടൻപൊരി പകുതി പൊട്ടിച്ചു. എതിർവശത്തിരുന്ന കടലാസ് സ്റ്റീൽ ഗ്ലാസിലെ പാലുംവെള്ളം ഊതിത്തണുപ്പിക്കുകയാണ്. പാർട്ടി സമ്മേളനത്തിന്റെ ആവേശം തെരുവുകളിൽ തോരണങ്ങളായി തൂങ്ങിക്കിടക്കുന്നുണ്ടെങ്കിലും നേതാക്കളുടെ ഉള്ളിലിരിപ്പുകൾ തെല്ലൊന്നുമല്ല പുകയുന്നത്.

"അല്ല കടലാസേ, ഈ ഉണ്ടൻപൊരിക്ക് നല്ല മധുരമുണ്ട്, പക്ഷെ സമ്മേളന ഹാളിൽ നിന്നിറങ്ങി വരുന്ന നേതാക്കളുടെ മുഖം കണ്ടാൽ തോന്നും പാവയ്ക്ക ജ്യൂസ് മൊത്തമായി അകത്താക്കിയതാണെന്ന്. അവിടെ എന്തൊക്കെ പുകിലുകളാണെന്നോ നടക്കുന്നത്!" കന്നാസ് ചായക്കടക്കാരൻ ബാപ്പൂട്ടിയോട് ഒരു ഉണ്ടൻപൊരി കൂടി നീട്ടാൻ ആംഗ്യം കാണിച്ചു.

കടലാസ് പാലുംവെള്ളം ഒരിറക്ക് ഇറക്കി ചിരിച്ചു. "പിന്നല്ലാതെ കന്നാസേ! തിരഞ്ഞെടുപ്പ് കഴിഞ്ഞതോടെ പാർട്ടിക്കകത്ത് ആത്മപരിശോധനയല്ല, ആത്മഹത്യാപരമായ അടിയാണ് നടക്കുന്നത്. പരാജയത്തിന്റെ കാരണങ്ങൾ ചികഞ്ഞെടുക്കാൻ തുടങ്ങിയപ്പോൾ ഓരോരുത്തരുടെയും ഉള്ളിലെ കട്ടപ്പന്മാർ ഒന്നൊന്നായി പുറത്തുചാടുകയാണ്. ആദ്യം ചാടിവീണത് ശൈലജ ടീച്ചറാണ്. 'എന്റെ മണ്ഡലം അങ്ങോട്ടുമിങ്ങോട്ടും മാറ്റിമറിച്ച് എന്നെ പെട്ടിയിലാക്കി പറ്റിച്ചേ' എന്ന് പറഞ്ഞ് ടീച്ചർ ഒരു മൂലയിലിരുന്ന് നെടുവീർപ്പിടുന്നു. 'കൂത്തുപറമ്പും മട്ടന്നൂരും വിട്ട് എന്നെ എന്തിനാണാവോ ആ പരീക്ഷണശാലയിലേക്ക് തള്ളിവിട്ടത്' എന്നാണ് ചോദ്യം. ടീച്ചറുടെ ആ വിലാപം കേട്ടാൽ കണ്ണൂരിലെ കരിങ്കൽ ക്വാറികൾ പോലും ഉരുകിപ്പോകും!"

"അത് കേട്ട് സഹതാപം തോന്നി നിന്നപ്പോഴാണ് അപ്പുറത്ത് നികേഷ് കുമാറിന്റെ ലൈവ് റണ്ണിംഗ് കമന്ററി," കന്നാസ് മീശതുടച്ചു. "'തളിപ്പറമ്പിൽ ഗോവിന്ദൻ മാഷിന്റെ ഭാര്യയെ നിർത്താൻ പാടില്ലായിരുന്നു, എന്നെ നിർത്തിയിരുന്നെങ്കിൽ ഒരുപക്ഷേ ഗോവിന്ദൻ മാഷ് വരെ ജയിച്ചേനെ' എന്ന മട്ടിലാണ് ആൾടെ നിലപാട്! മൈക്ക് കയ്യിൽ കിട്ടിയാൽ വാർ റൂമിലിരിക്കുന്ന പോലെ എന്ത് പറയണമെന്ന് ഒരു നിശ്ചയവുമില്ല. താൻ നിന്നാൽ അടുത്തുള്ള മണ്ഡലത്തിലെ സഖാവ് വരെ സുരക്ഷിതനായി ജയിച്ചു കയറും എന്ന ആത്മവിശ്വാസം കണ്ട് ബാക്കിയുള്ളവർ വാ പൊളിച്ചുപോയി!"

"ഇതിലും വലിയ കോമഡിയാണ് തവനൂരിൽ സംഭവിച്ചതെന്ന് കടലാസ് പറഞ്ഞു. "കെ.ടി. ജലീൽ കുർത്തയുടെ കൈ മടക്കിവെച്ച് ഫേസ്ബുക്കിൽ പോസ്റ്റിടാൻ കാരണം തപ്പുകയാണ്. 'എന്നെ പിണറായി വിജയൻ വെറുതെ അവിടെ 'ബലിയാടാ' ക്കിയതാണ്, അല്ലാതെ ഞാൻ തോൽക്കുമോ' എന്ന് പറഞ്ഞ് സ്വന്തം പ്രൊഫൈലിൽ വിലാപകാവ്യം എഴുതുന്നു. പാവം, എത്ര തവണ ജയിച്ചു കയറിയ ആളാണ്, ഒടുവിൽ ബലിക്കല്ലിൽ തലവെച്ചു കൊടുക്കേണ്ടി വന്നതിന്റെ സങ്കടം ചില്ലറയൊന്നുമല്ല."

"അതൊക്കെ പോട്ടെ കടലാസേ, തിരഞ്ഞെടുപ്പിൽ മത്സരിക്കാതെ മാറിനിന്നവരുടെ സന്തോഷം നീ കണ്ടോ?" കന്നാസ് ചിരിയമർത്തി. "തോമസ് ഐസക്കും ജയരാജന്മാരും ഒത്തുകൂടി നെഞ്ചിൽ കൈവെച്ച് വലിയൊരു ആശ്വാസത്തിന്റെ നെടുവീർപ്പിടുന്നു—'ഭാഗ്യം, അന്ന് സീറ്റ് ചോദിച്ചു വാങ്ങി അപഹാസ്യനാവാതെ തലയൂരി, അല്ലെങ്കിൽ ഇപ്പൊ പെട്ടിയും തലയിൽ വെച്ച് വീടുകളിൽ കയറിയിറങ്ങി നാണംകെടേണ്ടി വന്നേനെ!' എന്ന്. അപ്പോഴാണ് ഇടയിൽക്കയറി ഷംസീറിന്റെ ഡയലോഗ്: 'എനിക്ക് കുഞ്ഞികൃഷ്ണനിൽ വലിയൊരു ആരാധന തോന്നുന്നു' എന്ന്. സ്പീക്കർ കസേരയിലിരുന്ന് വിധി പറയുന്ന ലാഘവത്തോടെയാണ് ഈ ആരാധന പ്രഖ്യാപനം!"

കടലാസ് പൊട്ടിച്ചിരിച്ചു. "ഇനി അപ്പുറത്ത് പ്രതിപക്ഷ നേതാവാകാൻ നടക്കുന്ന വടംവലി കാണണം! പി. ജയരാജൻ സടകുടഞ്ഞെഴുന്നേറ്റ് പറയുന്നു, 'കാരായി രാജനെ പ്രതിപക്ഷ നേതാവാക്കണം' എന്ന്. അത് കേട്ടതും ജോയ് ചാടിയെഴുന്നേറ്റു, 'അങ്ങനെയെങ്കിൽ ധനതത്വം പ്രസംഗിച്ച് നിയമസഭ ഇളക്കിമറിക്കാൻ ബാലഗോപാലാണ് ബെസ്റ്റ്' എന്ന് പ്രഖ്യാപിച്ചു. ഇവർ തമ്മിലടിക്കുന്നത് കണ്ട് ഒരു മൂലയിൽ നിന്ന് കഷ്ടപ്പെട്ട് ജയിച്ചുവന്ന പ്രൊഫസർ രവീന്ദ്രനാഥ് മാഷ് തലയിൽ കൈവെച്ച് പിറുപിറുക്കുന്നു: 'ഈശ്വരാ, ഞാൻ മാത്രം എന്തിനാണോ ജയിക്കാൻ പോയത്, തോറ്റാൽ മിണ്ടാതിരിക്കാമായിരുന്നു! ഇനിയിപ്പോ ഇവരുടെ ഒച്ചപ്പാടും കേട്ട് സഭയിൽ ഒറ്റയ്ക്ക് ഇരിക്കേണ്ടി വരുമല്ലോ!'"

"അതിനിടയിൽ ആ മൊയ്തീൻ ഉണ്ടല്ലോ," കന്നാസ് പാലുംവെള്ളം ഊതിക്കുടിച്ച് ശബ്ദം താഴ്ത്തി. "ആരെങ്കിലും ഒന്ന് വാ തുറക്കുമ്പോഴേക്കും അദ്ദേഹം ഓടിവന്ന് വായ പൊത്തുന്നു—'എടോ, ഇ.ഡി. എന്നൊരു വാക്ക് ഈ പരിസരത്ത് ആരും മിണ്ടിപ്പോകരുത്, കേന്ദ്രത്തിൽ നിന്ന് വല്ലവരും കേട്ടാൽ പിന്നെ കരുവന്നൂർ വഴി അകത്തേക്ക് വിളിപ്പിക്കും!' എന്ന് പേടിച്ച് വിറച്ച് നടക്കുകയാണ്."

"ഇതൊക്കെ ഒന്നുമല്ല കന്നാസേ, കട്ടൻകാപ്പി കുടിച്ച് നടുമുറ്റത്തേക്ക് വന്ന ഇടുക്കിയുടെ ആശാൻ എം.എം. മണി മേശപ്പുറത്ത് ആഞ്ഞൊരടി വെച്ചു കൊടുത്തു: 'എല്ലാം എന്റെ കുഴപ്പമാണ്… അതായത്, എന്നെ അങ്ങ് മാറ്റിനിർത്തിയത് കൊണ്ടാണ് പാർട്ടിക്ക് ഈ ഗതി വന്നത്! നാല് പച്ചത്തെറിയും പറഞ്ഞ് ഞാൻ സ്റ്റേജിൽ ഉറഞ്ഞുതുള്ളിയില്ലെങ്കിൽ പിന്നെ ജനങ്ങൾക്ക് എന്ത് ആവേശം, പാർട്ടിക്ക് എന്ത് കാറ്റ്!' ആശാന്റെ തിയറി കേട്ട് നയരേഖ തയ്യാറാക്കാൻ വന്ന ബുദ്ധിജീവികൾ പെൻസിലും താഴെയിട്ട് ഓടി."

"അപ്പോഴാണ് എ.കെ. ബാലന്റെ ആത്മഗതം," കന്നാസ് തുടർന്നു. "'പാർട്ടിയുടെ അളവുകോൽ എവിടെപ്പോയി എന്ന് ഞാൻ നോക്കിക്കൊണ്ടിരിക്കുകയായിരുന്നു, ചെന്നു നോക്കുമ്പോൾ അതാ തോട്ടപ്പള്ളിയിലെ കരിമണലിൽ പൂണ്ടുപോയിരിക്കുന്നു!' എന്ന്! ആ അളവുകോൽ കരിമണലിൽ നിന്ന് പൊക്കിയെടുത്ത് ഇനി ഇവർ എന്ത് അളക്കാനാണോ എന്തോ!"

കടലാസ് കൈയടിച്ച് മേശപ്പുറത്ത് തട്ടി. "വിജയരാഘവന്റെ സങ്കടം അതിലും വലുതാണ്. 'നാട്ടുകാർ എനിക്ക് എന്ത് വേണമെങ്കിലും തന്നോട്ടെ, കേന്ദ്രകമ്മിറ്റിയോ പൊളിറ്റ് ബ്യൂറോയോ എന്തുമാവട്ടെ, എന്നാലും എന്റെ ഭാര്യയെ ആ ഇരിങ്ങാലക്കുടക്കാർ ഇങ്ങനെ തോൽപ്പിച്ചുകളഞ്ഞല്ലോ ദൈവമേ' എന്ന് പറഞ്ഞ് പുള്ളി കണ്ണുതുടയ്ക്കുന്നു. കണ്ണൂരിലെ കാറ്റിൽപ്പോലും ആ വിലാപം അലയടിക്കുന്നുണ്ട്."

"ഇതിലൊക്കെ വലിയ രാഷ്ട്രീയ ട്വിസ്റ്റ് എന്താണെന്നറിയോ കടലാസേ? ആലപ്പുഴയിലെ ആരിഫ് ഇപ്പോൾ തന്നെ മൊബൈൽ ഫോണും കയ്യിൽ പിടിച്ച് നാലുപാടും നോക്കുകയാണത്രേ. 'മറ്റു പാർട്ടികളിൽ നിന്നൊക്കെ വല്ലാത്ത ഓഫറുകളാണ് വരുന്നത്, ഒന്നു കണ്ണുചിമ്മിയാൽ മതി, മറുകണ്ടം ചാടാൻ ആളുകൾ റെഡിയാണ്' എന്ന് പറഞ്ഞ് സ്വന്തം മാർക്കറ്റ് റേറ്റ് പരസ്യമായി അനൗൺസ് ചെയ്ത് നടക്കുകയാണ്!"

"എന്നിട്ട് ആ നന്ദി പ്രകടനങ്ങളുടെ ഘോഷയാത്ര കണ്ടോ?" കടലാസ് ചിരിച്ചു മറിഞ്ഞു. "എച്ച്. സലാം വന്ന് ആരും കാണാതെ ജി. സുധാകരന്റെ കാലിൽ തൊട്ട് തൊഴുന്നു: 'ആരും തുണയില്ലാത്ത പ്രതിസന്ധി ഘട്ടത്തിൽ എന്റെ ഭാര്യക്ക് ആ യൂണിവേഴ്സിറ്റി ജോലി ഒപ്പിച്ചു തന്നതിന് അങ്ങയോട് മാത്രമാണ് എനിക്ക് നന്ദി' എന്ന്! സുധാകരൻ മാഷ് മനസ്സിൽ എന്തൊക്കെ കവിതകൾ രചിച്ചു കാണുമോ ആവോ!"

"അതിന്റെ അപ്പുറത്താണ് സജി ചെറിയാന്റെ വെളിപ്പെടുത്തൽ," കന്നാസ് പറഞ്ഞു. "ജയിച്ചതിന്റെ രഹസ്യം ചോദിച്ച മാധ്യമങ്ങളോട് പുള്ളി ഒരു കള്ളച്ചിരിയോടെ പറയുകയാണ്: 'എന്നെ ചെങ്ങന്നൂരിൽ ജയിപ്പിച്ചുവിട്ട ആ പ്രിയപ്പെട്ട കോൺഗ്രസുകാർക്ക് എന്റെ ഒരായിരം നന്ദി! അവർ ആത്മാർത്ഥമായി കാലുവാരിയില്ലായിരുന്നെങ്കിൽ ഞാൻ ഇന്ന് വല്ല കവലയിലും ചായ കുടിച്ചേനെ!' എന്ന്. അത് കേട്ടതും കൂടെയുണ്ടായിരുന്ന ബാലഗോപാലും ആവേശത്തോടെ തലയാട്ടി: 'സത്യം… എന്റെയും ഹൃദയം നിറഞ്ഞ നന്ദി ആ കോൺഗ്രസുകാരോട് തന്നെയാണ്!' തോറ്റ എം.എൽ.എമാർക്ക് മുന്നിലിരുന്ന് രണ്ട് മന്ത്രിമാർ പരസ്യമായി കോൺഗ്രസിന് നന്ദി പറയുന്നത് കണ്ട് അണികൾ ബോധംകെട്ട് വീഴാൻ തുടങ്ങി."

"അവസാനമാണ് ഏറ്റവും വലിയ സർജിക്കൽ സ്ട്രൈക്ക്," കടലാസ് പാലുംവെള്ളത്തിന്റെ അവസാന തുള്ളിയും നുണഞ്ഞു. "മന്ത്രി റിയാസ് വന്ന് മൈക്കെടുത്ത് സ്വതസിദ്ധമായ ഗൗരവത്തിൽ കാച്ചുകയാണ്: 'സ്വരാജും ഷംസീറും സനോജും ആര്യയും ചിന്തയും ജെയ്ക്കും അർഷോയും നികേഷും പോലുള്ള അലവലാതികൾക്കൊന്നും നിയമസഭയിൽ സീറ്റ് തരാഞ്ഞത് വേറൊന്നിനുമല്ല, അടുത്ത പാർലമെന്റ് തിരഞ്ഞെടുപ്പിൽ പരീക്ഷിച്ച് ഡൽഹിയിലേക്ക് കെട്ടുകെട്ടിക്കാനാണ്!' എന്ന്."

കന്നാസ് പൊട്ടിച്ചിരിച്ചു കൊണ്ട് എഴുന്നേറ്റു, "അതോടെ താഴെ ഇരുന്ന പാവം അണികൾ പരസ്പരം മുഖത്തോടുമുഖം നോക്കി തലയ്ക്ക് കൈവെച്ചു: 'അപ്പോൾ ഈ കപ്പൽ മുങ്ങുമെന്ന് ക്യാപ്റ്റന് നേരത്തെ തന്നെ അറിയാമായിരുന്നോ പടച്ചോനേ? അതുകൊണ്ടാണോ ഈ പരീക്ഷണങ്ങളൊക്കെ നടത്തിയത്?' എന്ന്!"

ബാപ്പൂട്ടിയുടെ പെട്ടിക്കടയിലെ മേശപ്പുറത്ത് കാലിയായ ഗ്ലാസുകൾ വെച്ച് കന്നാസും കടലാസും ബീച്ചിലെ ആൾക്കൂട്ടത്തിലേക്ക് ഇറങ്ങി നടന്നു. പാർട്ടിയുടെ അടുത്ത തിരുത്തൽ രേഖ ഇറങ്ങുന്നതിന് മുൻപ് ഇനിയും എത്രയെത്ര ഉണ്ടൻപൊരികൾ തിന്നേണ്ടി വരുമെന്ന കാര്യത്തിൽ മാത്രമാണ് ഇപ്പോൾ ഇരുവർക്കും സംശയമുള്ളത്!

കന്നാസും കടലാസും : രാധ മണമ്മൽ