കന്നാസും കടലാസും:

ആരുടെ തല, ആർക്ക് ലാഭം?

കന്നാസ്: എന്താ കടലാസേ... തെരഞ്ഞെടുപ്പൊക്കെ കഴിഞ്ഞു, പോളിംഗ് പെട്ടിയിലുമായി. എന്നിട്ടും നിന്റെ മുഖത്തൊരു വല്ലാത്ത ഗൗരവം? എൽ.ഡി.എഫിന്റെ ആ വലിയ 'വിലയിരുത്തൽ' യോഗത്തിന്റെ വല്ല വിശേഷവും കിട്ടിയോ?

കടലാസ്: വിശേഷമോ... അതൊരു ഒന്നൊന്നര വിലയിരുത്തലായിരുന്നു കന്നാസേ! മുറിയിൽ ഫാനിന്റെ കാറ്റാണോ അതോ നേതാക്കളുടെ നെട്ടോട്ടമാണോ എന്ന് തിരിച്ചറിയാൻ പറ്റാത്ത അവസ്ഥ. വോട്ടെടുപ്പ് കഴിഞ്ഞതോടെ എല്ലാവർക്കും ഒരു കാര്യം ബോധ്യമായിട്ടുണ്ട്—ഫ്ലെക്സിലെ വലിപ്പമല്ല, പെട്ടിയിലെ എണ്ണമാണ് പണിയുണ്ടാക്കുന്നത്!

കന്നാസ്: അല്ല, ആ 400 സ്ക്വയർ ഫീറ്റിൽ തിളങ്ങി നിന്ന 'തല'യെക്കുറിച്ച് ആരെങ്കിലും അവിടെ മിണ്ടിയോ?

കടലാസ്: മിണ്ടാനോ? ആരും മിണ്ടുന്നില്ല, പക്ഷേ എല്ലാവരും പരസ്പരം നോക്കുന്നുണ്ട്. 250 മീറ്റർ ഇടവിട്ട് നിരത്തിയ ആ ബോർഡുകൾ ഇപ്പോൾ വെയിലിനോടും മഴയോടും മല്ലിട്ടു നിൽക്കുകയല്ലേ. യോഗത്തിൽ പങ്കെടുത്തവർക്ക് ഇപ്പോഴാണ് ബുദ്ധി തെളിഞ്ഞത്—"ഇത്രയും വലിയ ബോർഡ് വെച്ചിട്ട് വേറെ ആരെയും അതിൽ കയറ്റാതിരുന്നത് ശരിയായില്ല" എന്ന് ചിലരൊക്കെ മെല്ലെ പിറുപിറുക്കുന്നുണ്ട്. പ്രത്യേകിച്ച് ഈ മുന്നണിയിലുള്ള 'കടുകുമണി' നേതാക്കൾ!

കന്നാസ്: അപ്പോ ഈ 'ബുദ്ധി കേന്ദ്രങ്ങൾ'... നമ്മുടെ നികേഷും ഗോവിന്ദൻ മാഷും ഒക്കെ എന്തുപറയുന്നു?

കടലാസ്: അവരൊക്കെ ഇപ്പോൾ 'റിസൾട്ട് വന്നിട്ട് കാണാം' എന്ന തത്വചിന്തയിലാണ്. നികേഷ് കൊടുത്ത ആ 'തല' ലൈൻ ശരിക്കും പിണറായി വിജയനിട്ട് കൊടുത്ത 'എട്ടിന്റെ പണിയാണോ' എന്ന് സിപിഐക്കാർ പോലും ഉള്ളിലിരുന്ന് ആലോചിക്കുകയാണ്. സ്വന്തം അണികൾക്ക് പോലും ഈ 'ഏകാംഗ പ്രദർശനം' അത്ര ദഹിച്ചിട്ടില്ലെന്നാണ് റിപ്പോർട്ട്. ജനം ഇത് 'ജനാധിപത്യമാണോ' അതോ 'രാജഭരണമാണോ' എന്ന് സംശയിച്ചു തുടങ്ങിയെന്ന് ചിലർ വിലയിരുത്തൽ യോഗത്തിൽ തൊണ്ട നനച്ച് പറഞ്ഞു എന്നാണ് കേൾക്കുന്നത്.

കന്നാസ്: അത് ശരിയാണല്ലോ... മുന്നണിയിലെ ബാക്കി പാർട്ടികൾക്ക് ഈ ബോർഡിൽ ഒരു ഇഞ്ച് സ്ഥലം പോലും കൊടുക്കാത്തതിനെക്കുറിച്ച് ജോസുമോനും റോഷിയുമൊന്നും ഒന്നും ചോദിച്ചില്ലേ?

കടലാസ്: അവരെന്ത് ചോദിക്കാൻ? യോഗത്തിൽ ഇരിക്കുമ്പോഴും അവരുടെയൊക്കെ കണ്ണിന്റെ മുമ്പിൽ ആ 400 സ്ക്വയർ ഫീറ്റ് ബോർഡ് ഇങ്ങനെ തെളിഞ്ഞു നിൽക്കുകയാവും. "ഞാൻ കൽപ്പിച്ചു, നിങ്ങൾ അനുസരിച്ചു" എന്ന ഭാവത്തിൽ ഇരിക്കുന്ന മുഖത്തിന് നേരെ ആര് ചോദ്യം ഉയർത്തും? പക്ഷേ അടിയൊഴുക്കുകൾ വോട്ടെണ്ണിക്കഴിയുമ്പോൾ അറിയാം. ഈ ഫ്ലെക്സ് അടിക്കാൻ ചിലവാക്കിയ കാശുണ്ടെങ്കിൽ കുറച്ചു പേർക്ക് കിറ്റ് കൊടുക്കാമായിരുന്നു എന്ന് വോട്ടർമാർ പറഞ്ഞു തുടങ്ങിയാൽ പിന്നെ നികേഷിന്റെ ബുദ്ധിയല്ല, ജനത്തിന്റെ ബുദ്ധിയാവും ജയിക്കുക.

കന്നാസ്: അപ്പൊ ചുരുക്കത്തിൽ, ഇത്രയും കോടികൾ പൊടിച്ചുള്ള ഈ ഫ്ലെക്സ് രാഷ്ട്രീയവും ഈ ഉപദേശി ബുദ്ധിയും കൊണ്ട് ആർക്കെങ്കിലും വല്ല ഗുണവുമുണ്ടായോ?

കടലാസ്: ഓ... ഉണ്ടല്ലോ! പാർട്ടിക്ക് വോട്ട് കിട്ടുമോ മുന്നണി ജയിക്കുമോ എന്നൊക്കെ റിസൾട്ട് വന്നാലേ അറിയൂ. പക്ഷേ ഈ ഒരു ഏർപ്പാട് കൊണ്ട് ഒന്നോ രണ്ടോ പേരുടെ ബാങ്കിലെ കടങ്ങളും മറ്റുള്ള ബാധ്യതകളും തീർക്കാൻ പറ്റി എന്നുള്ളതാണ് ഏക ആശ്വാസം!

കന്നാസ്: അതെങ്ങനെ?

കടലാസ്: പിന്നല്ലാതെ! ഈ ലക്ഷക്കണക്കിന് ഫ്ലെക്സ് അടിച്ചവനും അതിന്റെ പിന്നിൽ ചരടുവലിച്ച ആ ബുദ്ധി കേന്ദ്രങ്ങൾക്കും കൃത്യമായി 'പണി' കിട്ടി... പക്ഷേ അത് വോട്ടല്ല, നല്ല ഒന്നാന്തരം കമ്മീഷനും പ്രതിഫലവുമാണ്! നേതാവ് വെയിലു കൊണ്ട് ബോർഡിൽ നിൽക്കുമ്പോൾ, ഉപദേശികൾ എയർ കണ്ടീഷൻ മുറിയിലിരുന്ന് അവരുടെ ലോണുകൾ തീർക്കുന്ന തിരക്കിലായിരുന്നു.

ചുരുക്കത്തിൽ പറഞ്ഞാൽ, എൽ.ഡി.എഫിന് ഇത് 'തലവേദന'യായെങ്കിലും, ആ ഒന്നോ രണ്ടോ പേർക്ക് ഇത് നല്ലൊരു 'തലവര'യായി മാറി!

• #MyHead
• #OnlyMyHead
• #400SqFtFlex