കന്നാസും കടലാസും: ഇടുക്കി ആർച്ച് ഡാമിന്റെ താഴത്തെ ചായക്കടയിൽ
ഇടുക്കി ആർച്ച് ഡാമിന്റെ നിഴൽവീണ താഴ്‌വരയിലെ ചെറിയ തട്ടുകട. കുളിരുള്ള കാറ്റിൽ തകരക്കൂര ചെറുതായി ഇളകുന്നുണ്ട്. പെട്ടെന്ന് ഒരു മൂളലോടെ കടയിലെ ഫിലമെന്റ് ബൾബ് അണഞ്ഞു. മിക്സിയുടെ ശബ്ദം നിലച്ചു.
ചായക്കടക്കാരൻ ഇരുട്ടിലേക്ക് നോക്കി നെടുവീർപ്പിട്ടു: "പോയി! ഇന്നത്തെ ക്വാട്ട തീർന്നു."
ബെഞ്ചിൽ ഇരുന്ന കന്നാസ് കയ്യിലെ ഗ്ലാസ് താഴെവെച്ച് ഇരുട്ടിലേക്ക് തുപ്പുന്ന ശബ്ദത്തോടെ തുടങ്ങി.
കന്നാസ്: ദാണ്ടെ പോയി! കടലാസേ, ഇതിലും ഭേദം നമ്മൾ ആ ഡാമിന്റെ മുകളിൽ പോയി ഇത്തിരി ഉറുമാമ്പഴം തിന്ന് ഇരിക്കുന്നതായിരുന്നു. എടാ, പവർകട്ട് ആണെന്ന് മന്ത്രി വന്ന് മൈക്കിലൂടെ വിളിച്ചുപറയുന്നത് എന്തിനാടാ? കേരളം ഉണ്ടായ കാലം തൊട്ട് ഇന്നേവരെ ഒരു ദിവസമെങ്കിലും ഇവന്മാര് കറണ്ട് കട്ട് ചെയ്യാതിരുന്നിട്ടുണ്ടോ? ഈ മന്ത്രിക്ക് വല്ല വിവരവുമുണ്ടോ?
കടലാസ്: (ബീഡിക്ക് തീ കൊളുത്താൻ ശ്രമിച്ചുകൊണ്ട്) പവർകട്ട് ഔദ്യോഗികമായി അറിയിക്കുന്നത് എന്തിനാണെന്ന് അറിയാമോ കന്നാസേ? അതൊരു 'സർക്കാർ പ്രോട്ടോകോൾ' ആണ്. ഇല്ലെങ്കിൽ ആളുകൾ കരുതും ട്രാൻസ്ഫോർമറിൽ വല്ല അണ്ണാനും വീണതാണെന്ന്! ഇതിപ്പോ "ഞങ്ങൾ കൃത്യമായി പ്ലാൻ ചെയ്ത് ഇരുട്ടിലാക്കുന്നതാണ്" എന്ന് പ്രഖ്യാപിക്കുമ്പോൾ അതിനൊരു ഗാംഭീര്യം ഉണ്ടല്ലോ.
കന്നാസ്: ഗാംഭീര്യം എന്റെ മൂക്ക്! എടാ, നമ്മുടെ വൈദ്യുത നിലയങ്ങളിലെ ജനറേറ്ററുകൾ ഒന്നടങ്കം നശിപ്പിച്ചു വെച്ചിരിക്കുകയാണ് ഈ വിദ്വാന്മാർ. ആദ്യം മണിയാശാനും കൂട്ടരും ഭരിച്ച് അത് തുലച്ചു. പന്നിയാർ പവർഹൗസ് ലാവ്‌ലിൻ കേസിന്റെ പേരും പറഞ്ഞ് അന്ന് പൊളിച്ചിട്ടത് വേറെ. കായംകുളം താപനിലയത്തിൽ നിന്ന് വൈദ്യുതി എടുക്കണമെങ്കിൽ നാലിരട്ടി പണം കൊടുക്കണം. അതൊക്കെ കൽക്കരി വെച്ച് നടത്താവുന്നതേയുള്ളൂ. അല്ലെങ്കിൽ ഈ കാണുന്ന ഡാമുകളിലെ ചെളി വാരി സംഭരണശേഷി കൂട്ടണം. അതൊന്നും ഇവന്മാർക്ക് ചെയ്യണ്ട.
കടലാസ്: ചെളി വാരിയാൽ പിന്നെ കമ്മിഷൻ വാരാൻ പറ്റുമോ കന്നാസേ? കായംകുളത്ത് നാഫ്ത കത്തിച്ച് ഉണ്ടാക്കുന്ന കറണ്ടിന് യൂണിറ്റിന് പൊന്നുംവിലയാ. ആ പണം മുഴുവൻ പുറത്തുനിന്ന് വാങ്ങുന്ന കമ്പനികൾക്ക് കൊടുക്കണം. എന്നിട്ട് നഷ്ടം വരുന്നത് ജനങ്ങളുടെ തലയിലേക്ക് സർചാർജ് ആയി അടിച്ചേൽപ്പിക്കും. അതല്ലേ ലൈൻ!
കന്നാസ്: അതാണ് ഞാൻ ചോദിക്കുന്നത്! കേരളത്തിലെ വൈദ്യുതി ബോർഡ് ഓഫീസുകൾ മൊത്തം അടക്കിവാഴുന്നത് കുറേ പരട്ട ഉദ്യോഗസ്ഥന്മാരാണ്. മാസാവസാനം ഒരു പാവപ്പെട്ടവൻ ബില്ലടയ്ക്കാൻ ഒരു ദിവസം വൈകിയാൽ മതി, ഉച്ചയാകുമ്പോഴേക്ക് ഏണിപ്പടിയും തൂക്കി വരും... ഫ്യൂസ് ഊരാൻ! അത്രയും മിടുക്കാണ്. ജനറേറ്ററുകൾ കേടാവാതെ നോക്കാനോ, പ്രസരണ നഷ്ടം കുറയ്ക്കാനോ ഒരുത്തനും കാണില്ല. വൈദ്യുതി വിഷയത്തിൽ ലേശം വിവരമുള്ള, നട്ടെല്ലുള്ള ഒരു ഉദ്യോഗസ്ഥനെ ഇതിന്റെയൊക്കെ അന്വേഷണത്തിനായി വെച്ചാൽ തീരാവുന്ന പ്രശ്നമേയുള്ളൂ ഇവിടെ.
കടലാസ്: ഉദ്യോഗസ്ഥരെ വെച്ച് അന്വേഷിക്കാനോ? അന്വേഷണം നടത്തിയാൽ കറണ്ട് പോയത് എങ്ങോട്ടാണെന്നല്ല, പോയ പണം ആരുടെയൊക്കെ പോക്കറ്റിലാണെന്ന് നാട്ടുകാർ അറിയും. അതുകൊണ്ട് ആ റിസ്ക് ആരും എടുക്കില്ല.
കന്നാസ്: പിന്നെ മറ്റൊരു കോമഡി! ശബരിമല വിഷയത്തിലും ആലപ്പാട്ടെ കരിമണൽ കൊള്ളയിലും അണ്ണാക്കിൽ പിണ്ണാക്ക് കയറ്റിവെച്ച് മിണ്ടാതിരുന്ന ചില ഭാഗ്യലക്ഷ്മിമാരൊക്കെ ഉണ്ടല്ലോ... അവരൊക്കെയാണ് ഇപ്പോൾ നാട്ടിലെ വലിയ ഉപദേശകരായി സോഷ്യൽ മീഡിയയിൽ ഇറങ്ങിയിരിക്കുന്നത്! അന്ന് വാ തുറക്കാത്തവർക്കാണ് ഇപ്പോൾ സർക്കാരിന്റെ പവർകട്ടിനെപ്പറ്റി പ്രബന്ധം ഇറക്കാൻ വലിയ തിടുക്കം.
കടലാസ്: അതാണ് കാലത്തിന്റെ ഒരു കളി. വെളിച്ചം ഉള്ളപ്പോൾ പലർക്കും മിണ്ടാൻ ഭയമായിരുന്നു; ഇപ്പോൾ നാട് മുഴുവൻ ഇരുട്ടിലായപ്പോൾ എല്ലാവർക്കും ശബ്ദം തിരിച്ചു കിട്ടി!
കന്നാസ്: (ചൂടായി മേശപ്പുറത്ത് ആഞ്ഞടിച്ച്) ശബ്ദം തിരിച്ചു കിട്ടിയത് വെറുതെയല്ല കടലാസേ! ജനങ്ങൾക്ക് കഴിഞ്ഞ പത്തുകൊല്ലം ഇല്ലാത്ത ചൂടും വിയർപ്പും, വാങ്ങിക്കൂട്ടിയ എസികൾ പ്രവർത്തിക്കാത്ത അവസ്ഥയും, കൊതുകുകടിയേറ്റ് രാത്രികളിൽ കുഞ്ഞുങ്ങൾ വാവിട്ടു കരയുന്ന കോലവും കണ്ടുനിൽക്കാൻ വയ്യാതായിരിക്കുന്നു. ഇപ്പൊ ചില കേന്ദ്രങ്ങളിൽ നിന്നുള്ള അടക്കംപറച്ചിൽ കേട്ടില്ലേ... "ഇതൊക്കെ മാറാൻ ആ മൂന്നാം പിണറായി വന്നാൽ മതിയാർന്നു" എന്ന്! എന്ത് ദുരന്തമാണിത്! കേരളത്തെ ഇരുട്ടിലാക്കി സ്വന്തം ജീവിതം തന്നെ ഇരുട്ടിലാവുന്ന അവസ്ഥയിലാണ് മൂപ്പരിപ്പോ പോയിക്കൊണ്ടിരിക്കുന്നത്. ഈ ഇടതന്മാർ ശരിക്കും ജനങ്ങളുടെ വഞ്ചിക്ക് തുരപ്പൻ വെക്കുന്ന തണ്ടുതുരപ്പന്മാർ തന്നെ അല്ലേ?
കടലാസ്: (ചിരിയോടെ തലയാട്ടി) സംശയമുണ്ടോ നിനക്ക്? ഭരണത്തിന്റെ മധുരം നുണഞ്ഞ് മാളങ്ങളിൽ പതുങ്ങിയിരുന്ന സാഹിത്യ സാംസ്കാരിക നായകന്മാരും അവാർഡ് തീറ്റക്കാരും ഉണ്ടല്ലോ... അവന്മാരും ഇനി വിയർത്തൊലിച്ച് ചൂട് സഹിക്കാൻ വയ്യാതെ മാളങ്ങളിൽ നിന്ന് ഓരോന്നായി പുറത്തുചാടും! ന്യായീകരണ ക്യാപ്സൂളുകൾ ഉരച്ചുനോക്കാൻ പോലും വെളിച്ചമില്ലാത്ത കാലം വരികയല്ലേ.
കന്നാസ്: (എഴുന്നേറ്റുകൊണ്ട്) വേറെന്ത് പറയാൻ! വിയർത്തുനാറിയ ഈ സാംസ്കാരിക സിംഹങ്ങളെല്ലാം കൂടി ഇനി ചൂടിനെക്കുറിച്ച് നാലുവരി കവിതയെഴുതി ആശ്വസിക്കട്ടെ. കടേക്കാരേ, ആ തകരപ്പാട്ടയിലെ മണ്ണെണ്ണവിളക്ക് ഇങ്ങോട്ട് എടുത്തു വെക്ക്... കറണ്ട് വരാൻ ഇനി അടുത്ത തിരഞ്ഞെടുപ്പ് കഴിയണം!
മോഹൻദാസ് അപ്പ : കന്നാസും കടലാസും
