പോലീസ് ക്യാമ്പിന്റെ പുറകുവശത്തെ ചായക്കടയിലെ നീളൻ ബെഞ്ചിലിരുന്ന് കന്നാസ് ഗ്ലാസ്സ് താഴെവെച്ചു.
അപ്പുറത്ത് ചൂടുള്ള കട്ടൻചായ ഊതിക്കുടിച്ച് പരിപ്പുവടയുടെ പങ്ക് നോക്കി കടലാസും ഇരിപ്പുണ്ട്. റോഡിൽ അപ്പോഴും വാട്ടർ പീരങ്കിയുടെ ഒച്ചയും ലാത്തിച്ചാർജിന്റെ ഒടുക്കവും കെട്ടടങ്ങിയിരുന്നില്ല.
"എടോ കടലാസേ, ഈ തെരുവിൽ നടക്കുന്നതൊക്കെ സമരം തന്നെയോ, അതോ നാടക കമ്പനിക്കാരുടെ റിഹേഴ്സലോ?" കന്നാസ് നെടുവീർപ്പിട്ടു.
"അങ്ങനെ ചോദിക്ക് കന്നാസാ! സമര ചരിത്രം നമ്മൾ എത്ര കണ്ടിരിക്കുന്നു! നമ്മുടെ ചിന്താ ജെറോം എക്സിക്യൂട്ടീവ് ലുക്കിൽ വിപ്ലവം തുടങ്ങിവെച്ച കാലം ഓർമ്മയുണ്ടോ? സെക്രട്ടേറിയറ്റിന്റെ മുന്നിൽ തന്റേടത്തോടെ ചെന്നുനിന്നു. വന്നത് നമ്മുടെ വാട്ടർ കാനൻ! കോർപ്പറേഷൻ പൈപ്പിലെ അഴുക്കുവെള്ളം സർവ്വ പ്രതാപത്തോടെയും ചീറ്റിയടിച്ചപ്പോ വിപ്ലവനായികയുടെ സകല ചന്തവും ഒലിച്ചുപോയി, സമരം അവിടെവെച്ച് തന്നെ ചീറ്റി നാണക്കേടായി."
"അതവിടെ നിക്കട്ടെ, ഈയടുത്ത് കൊല്ലത്ത് മൈക്ക് കിട്ടിയപ്പോൾ ആള് കാച്ചിയ മുദ്രാവാക്യം കേട്ടോ നീ?" കന്നാസ് ചോദിച്ചു.
"കേൾക്കാതിരിക്കുമോ! തെറിവിളിയാണോ അതോ പ്രാസത്തിലുള്ള മുദ്രാവാക്യമാണോ എന്ന് പിഎച്ച്ഡിക്കാർക്ക് പോലും തിരിയാത്ത പരുവത്തിലായിരുന്നു ആ സാഹിത്യ പ്രകടനം. കേട്ടുനിന്ന അണികൾക്ക് പോലും ചമ്മലായിപ്പോയി."
"പണ്ട് ഉമ്മൻ ചാണ്ടിയുടെ ഭരണകാലത്ത് സമരം കൊഴുപ്പിക്കാൻ ഡിവൈഎഫ്ഐക്കാർ തുണിയിൽ ചുവന്ന മഷിയൊഴിച്ച് നാടകം കളിച്ചതോ കടലാസേ?"
"അതൊരു കൺകെട്ടുവിദ്യയല്ലേ! ഒരടിയും ഏൽക്കാതെ, പോക്കറ്റിൽ കുപ്പിയിലിട്ട് കൊണ്ടുവന്ന ചുവന്ന മഷി സ്വന്തം തലയിലും കുപ്പായത്തിലും ഒഴിച്ച് 'ദേ പോലീസ് അടിച്ചുപൊളിച്ചേ' എന്ന് പറഞ്ഞ് ക്യാമറയ്ക്ക് മുന്നിൽ ബോധംകെട്ടു വീണ ആ അഭിനയത്തിന് ഓസ്കാർ കൊടുക്കണമായിരുന്നു!"
"അന്നത്തെ ഗുണ്ടാ പോലീസുകാരെ ഇറക്കി അങ്ങോട്ടുമിങ്ങോട്ടും തലക്കടിപ്പിച്ച കളികൾ ഓർക്കുന്നുണ്ടോ നീ?"
"ഓർക്കാതിരിക്കാൻ പറ്റുമോ? സമരക്കാരെ നേരിടാൻ പാർട്ടി പോലീസുകാരെയും പോലീസിനെ തല്ലാൻ സ്വന്തം ഗുണ്ടകളെയും ഇറക്കി ചോരയൊഴുക്കിയ ആ കാലം ഇതേ ബെഞ്ചിലിരുന്ന് നെടുവീർപ്പിട്ട എത്രയോ പോലീസുകാരുടെ ചോരക്കണ്ണീരാണ്."
"ഉമ്മൻ ചാണ്ടിയുടെ ജനസമ്പർക്ക യാത്രയ്ക്ക് നേരെ കല്ലേറ് നടത്തിയ ആ ക്രൂരത മറന്നോ കടലാസേ?"
"എങ്ങനെ മറക്കാനാ കന്നാസാ! കണ്ണൂരിലെ ജനസമ്പർക്ക പരിപാടിക്ക് മുഖ്യമന്ത്രി വരുമ്പോൾ വഴിയിൽ കാത്തുനിന്ന ഡിവൈഎഫ്ഐക്കാർ എറിഞ്ഞത് ഒന്നാന്തരം കലിങ്കല്ലാണ്! കാറിന്റെ ചില്ല് തകർത്ത് ആ കല്ല് നേരെ കൊണ്ടത് ഉമ്മൻ ചാണ്ടിയുടെ നെഞ്ചത്തും നെറ്റിയിലുമാണ്. ചോരയൊലിപ്പിച്ച് നിൽക്കുന്ന മുഖ്യമന്ത്രിയെ കണ്ടിട്ട് നമ്മൾ പോലും അന്തംവിട്ടുപോയി."
"എന്നിട്ട് ഈയടുത്ത് പിണറായിയുടെ നവകേരള സദസ്സ് യാത്രയിൽ എന്തായിരുന്നു തമാശ?"
"അവിടെ പൂച്ചട്ടി കൊണ്ടായിരുന്നു വിപ്ലവം! നവകേരള ബസിന് നേരെ കരിങ്കൊടി കാട്ടിയ യൂത്ത് കോൺഗ്രസുകാരെ ഡിവൈഎഫ്ഐക്കാർ വളഞ്ഞിട്ട് തല്ലിയത് റോഡിലെ കോൺക്രീറ്റ് പൂച്ചട്ടി കൊണ്ടും ഹെൽമെറ്റും കൊണ്ടാണ്! എന്നിട്ട് അതിനെ വിശേഷിപ്പിച്ചത് 'ജീവൽരക്ഷാ പ്രവർത്തനം' എന്നായിരുന്നു. പൂച്ചട്ടികൊണ്ട് തലക്കടിക്കുന്നത് ജീവൻ രക്ഷിക്കാനാണെന്ന് ആദ്യമായിട്ടാണ് ഈ നാട് കേട്ടത്!"
"എന്നിട്ട് 'ഡാ... പോലീസ് അടിക്കുന്ന ആംഗിളിൽ ഫോട്ടോ എടുത്ത് വാട്സാപ്പിൽ അയക്ക്' എന്ന് വിദ്യാർത്ഥി നേതാവ് ഒച്ചവെച്ച ആ തമാശ ഓർമ്മയുണ്ടോ?"
"അതല്ലേ ഇപ്പോഴത്തെ ട്രെൻഡ്! അടി കിട്ടിയാലും ഇല്ലെങ്കിലും ആംഗിൾ ശരിയാവണം. വാട്സാപ്പിൽ പടം അയച്ച് ഫേസ്ബുക്കിൽ ക്യാപ്ഷൻ ഇട്ടാലേ നേതാവിന് രക്തസാക്ഷി പരിവേഷവും ലൈക്കും കിട്ടൂ. സമരം കഴിഞ്ഞാൽ അണികൾ സ്റ്റേഷനിലും നേതാവ് എസി കാറിലും!"
"കഴിഞ്ഞ പത്തുകൊല്ലത്തെ സമരങ്ങളിൽ വെച്ച് ആ കിസ്സ് ഓഫ് ലൗ എന്തായിരുന്നു കടലാസേ?"
"മറൈൻ ഡ്രൈവിലെ സദാചാര വിരുദ്ധ സമരം! പോലീസും സദാചാരവാദികളും ഒരുവശത്ത്, നടുറോഡിൽ പരസ്യമായി കെട്ടിപ്പിടിച്ചു ചുംബിക്കുന്ന യുവജനങ്ങൾ മറുവശത്ത്. ലാത്തിവീശണോ നോക്കിനിൽക്കണോ എന്ന് പോലീസുകാര് അന്തംവിട്ടുപോയ നാളുകൾ!"
"ജിഷ്ണു പ്രണോയിയുടെ അമ്മ മഹിജയെ പോലീസ് ആസ്ഥാനത്തിന് മുന്നിൽ വലിച്ചിഴച്ച സംഭവം മറന്നോ നീ?"
"ഒരിക്കലും മറക്കില്ല കന്നാസേ. മകന് നീതി തേടി വന്ന ഒരമ്മയെ റോഡിലിട്ട് വലിച്ചിഴച്ചതോടെ കേരളം കത്തിയെരിഞ്ഞു. കാക്കിക്ക് ഏറ്റവും നാണക്കേടുണ്ടാക്കിയ സംഭവങ്ങളിലൊന്നായിരുന്നു അത്."
"ശബരിമല യുവതീപ്രവേശന കാലത്തെ ആ നാമജപവും റോഡ് യുദ്ധങ്ങളും ഓർക്കുന്നുണ്ടോ?"
"പമ്പയിലും നിലയ്ക്കലും നമ്മൾ വാങ്ങിക്കൂട്ടിയ ഏറും നാമജപവും മറക്കുമോ? ബിജെപിക്കാർ ഹർത്താൽ നടത്തി റോഡിൽ തീയിട്ടപ്പോൾ, സർക്കാർ പ്രതിരോധിക്കാൻ കാസർകോട് മുതൽ തിരുവനന്തപുരം വരെ വനിതാ മതിൽ പണിതു. പോലീസുകാർ നടുക്കകപ്പെട്ട് കഷ്ടപ്പെട്ടു."
"സിഎഎ വന്നപ്പോൾ ഇവിടെ നടന്ന ആ സംയുക്ത സമരം ഓർമ്മയുണ്ടോ?"
"അന്ന് ഭരണപക്ഷവും പ്രതിപക്ഷവും ഒന്നിച്ച് രക്തസാക്ഷി മണ്ഡപത്തിൽ സത്യഗ്രഹം ഇരുന്നു. പിന്നാലെ വിദ്യാർത്ഥി സംഘടനകൾ സംസ്ഥാനവ്യാപകമായി രാപ്പകൽ ഉപരോധങ്ങളും സമരങ്ങളും കൊണ്ട് തെരുവുകൾ സ്തംഭിപ്പിച്ചു."
"യൂണിവേഴ്സിറ്റി കോളേജിൽ സ്വന്തം സഖാവിനെ കുത്തിയതും പിഎസ്‌സി പരീക്ഷാ തട്ടിപ്പും ഓർമ്മയുണ്ടോ കടലാസേ?"
"ആ കാമ്പസിൽ വിദ്യാർത്ഥിയെ കുത്തിവീഴ്ത്തിയ എസ്എഫ്ഐ നേതാക്കളുടെ വീട്ടിൽ നിന്ന് യൂണിവേഴ്സിറ്റി ഉത്തരക്കടലാസും പോലീസ് പരീക്ഷയുടെ ഒന്നാം റാങ്കും കിട്ടിയത് നമ്മളല്ലേ പിടിച്ചത്! പഠിച്ചു പരീക്ഷയെഴുതിയ പാവം ഉദ്യോഗാർത്ഥികൾ ദിവസങ്ങളോളം സെക്രട്ടേറിയറ്റിന് മുന്നിൽ മുട്ടിലിഴഞ്ഞു സമരം ചെയ്തു."
"കൊറോണ കാലത്ത് സ്വർണ്ണക്കടത്ത് കേസ് വന്നപ്പോഴുള്ള സമരങ്ങൾ ഓർക്കുന്നുണ്ടോ?"
"മാസ്കും വെച്ച് ജനങ്ങൾ വീട്ടിലിരുന്ന കാലത്ത്, മുഖ്യമന്ത്രിയുടെ രാജി ആവശ്യപ്പെട്ട് പ്രതിപക്ഷം നടത്തിയ സെക്രട്ടേറിയറ്റ് മാർച്ച്! കൊറോണയെ വകവെക്കാതെ കണ്ണീർവാതകവും ലാത്തിച്ചാർജും കൊണ്ട് ആ പ്രദേശം പുകഞ്ഞുനിന്നു."
"കെ-റെയിലിന്റെ മഞ്ഞക്കുറ്റി പിഴുതെറിഞ്ഞ സമരം എങ്ങനെയുണ്ടായിരുന്നു?"
"നാട്ടുകാരും അമ്മമാരും കല്ലിന് മുകളിൽ കയറിയിരുന്ന് പ്രതിഷേധിച്ചു. മാടപ്പള്ളിയിലും ചോറ്റാനിക്കരയിലും പോലീസുകാർക്ക് നേരെ മണ്ണെണ്ണയൊഴിച്ചും കല്ലെറിഞ്ഞും തെരുവ് യുദ്ധം നടന്നു. അവസാനം പദ്ധതി തന്നെ തണുത്തുപോയി."
"തെരുവ് വിട്ട് ഇൻഡിഗോ വിമാനത്തിൽ മുഖ്യമന്ത്രിക്ക് നേരെ നടന്ന ആ സമരം എന്തായിരുന്നു കടലാസേ?"
"സ്വർണ്ണക്കടത്ത് ആരോപണത്തിൽ യൂത്ത് കോൺഗ്രസുകാർ ആകാശത്ത് വിമാനത്തിനുള്ളിൽ കയറി മുദ്രാവാക്യം വിളിച്ചു! ഇപ്പുറത്ത് ഇ.പി. ജയരാജൻ ചാടിയെഴുന്നേറ്റ് അവരെ തള്ളി താഴെയിട്ടു. അവസാനം വിമാനക്കമ്പനി എല്ലാവർക്കും യാത്രാവിലക്ക് നൽകി, നമ്മൾ വിമാനത്തിലെ വധശ്രമത്തിന് കേസും എടുത്തു!"
"വിഴിഞ്ഞത്ത് ലത്തീൻ അതിരൂപതയുടെ നേതൃത്വത്തിൽ നടന്ന സമരം എത്ര നാളായിരുന്നു?"
"നൂറ്റിനാൽപ്പത് ദിവസത്തിലധികം! റോഡ് ഉപരോധം തുടങ്ങി അവസാനം വിഴിഞ്ഞം പോലീസ് സ്റ്റേഷൻ വരെ വളഞ്ഞ് അടിച്ച് തകർത്തു. എത്രയോ പോലീസുകാർക്ക് പരിക്കുപറ്റി ആശുപത്രിയിലായി."
"സിദ്ധാർത്ഥൻ എന്ന പയ്യൻ ഹോസ്റ്റലിൽ ക്രൂരമായി കൊല്ലപ്പെട്ട സംഭവം ഓർമ്മയുണ്ടോ?"
"കേട്ടാൽ ചോര തിളയ്ക്കുന്ന സംഭവം! മൂന്ന് ദിവസം ആ പയ്യനെ വിചാരണ ചെയ്ത് കൊലയ്ക്ക് കൊടുത്ത കോളേജ് ഗുണ്ടായിസത്തിനെതിരെ സംസ്ഥാനവ്യാപകമായി വിദ്യാർത്ഥി സംഘടനകൾ തെരുവിലിറങ്ങി. അതോടെ കേസ് സിബിഐക്ക് വിടേണ്ടി വന്നു."
"ഇപ്പോഴത്തെ ഈ ഇ.ഡിക്ക് എതിരെയുള്ള സമരങ്ങളുടെ രഹസ്യമെന്താ കടലാസേ?"
"അത് വലിയ രാഷ്ട്രീയക്കളി! കരുവന്നൂർ ബാങ്ക് തട്ടിപ്പിൽ അന്വേഷണം വന്നപ്പോൾ സിപിഎമ്മുകാർ ഇ.ഡി ഓഫീസിലേക്ക് മാർച്ച് നടത്തുന്നു. നേതാക്കൾ ഹൈക്കോടതിയിൽ പോയി സ്റ്റേ വാങ്ങുമ്പോൾ, ബാരിക്കേഡിൽ നമ്മുടെ ജലപീരങ്കിയുടെ വെള്ളം കുടിക്കാൻ പാവം അണികൾ തെരുവിൽ ബാക്കി!"
"ചുരുക്കം പറഞ്ഞാൽ കടലാസേ, കാലം മാറിയാലും കൊടിയുടെ നിറം മാറിയാലും ഇവന്മാരുടെ സ്ക്രിപ്റ്റ് മാറില്ല. അന്ന് മഷി തുണിയിൽ, ഇന്ന് ഫിൽറ്റർ വാട്സാപ്പിൽ; അന്ന് നെഞ്ചത്തോട്ട് കലിങ്കല്ല്, ഇന്ന് ജീവൻരക്ഷിക്കാൻ പൂച്ചട്ടി; അന്ന് റോഡിൽ, ഇന്ന് ആകാശത്ത് ഫ്ലൈറ്റിൽ മുദ്രാവാക്യം. പോലീസുകാരൻ വെയിലത്ത് നിന്ന് അടി മേടിക്കണം, മെഡിക്കൽ കോളേജ് കാഷ്വാലിറ്റിയിൽ ബെഡ് ബുക്ക് ചെയ്തു വെക്കണം. എഴുന്നേൽക്ക്, സെക്രട്ടേറിയറ്റിന്റെ മെയിൻ ഗേറ്റിൽ അടുത്ത ബാച്ച് കല്ലെറിയാൻ റെഡിയായി നിൽപ്പുണ്ട്!"
കന്നാസും കടലാസും : മോഹൻ അപ്പ
